Dagana 25. – 26. október var haldin norræn punktaletursráðstefna í húsi Blindrafélagsins að Hamrahlíð 17. Til ráðstefnunnar mættu þátttakendur frá Íslandi, Danmörku, Noregi, Finnlandi og Svíþjóð, auk þess sem nokkrir þátttakendur tóku þátt í gegnum Teams.
Ráðstefnan stóð yfir í tvo daga og var farið um víðan völl. Meðal þess sem rætt var um var punktaletur í stærðfræði og tónlist, sem voru málefni sem brunnu á öllum þátttakendum. Þá voru einnig fyrirlestrar um tilgang punktalesturskennslu, 8 punkta letur og fleira. Þá var ákveðið að á næsta ári færi ráðstefnan fram í Finnlandi, en fram að því yrðu stofnaðir starfshópar um tónlist, stærðfræði og 8 punkta letur sem myndu starfa fram að næsta fundi.
Mjög góður rómur var gerður að ráðstefnunni og mikið talað um mikilvægi þess að fólk hittist reglulega til að ræða um og þróa punktaletur áfram á Norðurlöndum. Þá var athyglisvert að sjá að öll lönd eru að miklu leyti að glíma við sömu vandamálin og því er mjög gagnlegt að heyra og sjá hvað aðrir eru að gera.
Mynd af þátttakendum ráðstefnunnar.